KRALENDIJK – Riba 7 i 8 di dezèmber 2024 Boneiru lo ta pa promé biaha anfitrion di Kampionatonan di Tènis Boneiru. Ku kasi 30 partisipante e torneo ta yen i e espektativanan ta hopi haltu. “Esaki ta un paso fantástiko pa tènis na Boneiru,” segun Paul Ruijs, miembro di e liderato di kompetensia. “Den e djes añanan ku mi ta na Boneiru, nos no tabatin nunka un kampionato asina.

E torneo lo konsistí di tantu kompetensianan individual komo dòbel. “Pa e individualnan nos a traha un skema knock-out,” Ruijs ta splika. “Nos a pèrkurá pa hungadónan di diferente nivel no ta hunga mesora kontra e hungadónan mas fuerte. Asina tur hende ta hana un chèns hustu.”

Ta hunga e partidonan dòbel den pulnan chikitu. “Nos a traha tres pul chikitu,” Ruijs ta sigui. “Kada hungadó ta hunga por lo ménos dos wega i e timnan mas fuerte ta enfrentá otro despues.”

Promé kampionato

Segun Ruijs e kampionato ta un paso den direkshon di mas kompetensia i embolbimentu riba e isla. “Nos ta spera ku esaki ta duna un estímulo i ku mas persona lo bai partisipá,” e ta bisa entusiasmá. “Esaki ta e promé kampionato i nos ta spera ku hopi mas lo sigui den futuro.”

E kompetensianan lo tuma lugá na dos diferente sitio: Eddie’s i Sabadeco. Ruijs ta invitá tur hende pa bin wak. “Nos ta sòru pa algun snèks i kos di bebe, spesialmente durante e final djadumingu na Sabadeco. E ta bai bira un evento ku hopi ambiente.”

Ruijs ta enfatisá tambe e embolbimentu di talentonan lokal. “E tòpnan di e isla tambe ta partisipá, pues e ganadó lo ta kasi sigur un persona di Boneiru,” e ta splika. “Ounke nos no tin kompetensia pa damanan apart ainda, e damanan por partisipá i asta bira kampion.”

Ku bista riba futuro Ruijs ta optimista. “Nos ta drùk ku organisá klínikanan pa hubentut i kompetensianan chikitu na e kanchanan di tènis di Eddie’s. Tambe nos ta wak e renobashon di e kanchanan di tènis, di moda ku na 2025 nos tin dos kancha nobo bunita.” Boneiru no ta wak solamente mehorashon di e kanchanan di tènis.  Tambe ta parse ku lo no dura hopi mas ku lo por bai hunga Padel.  Lo tin kòmbersashonnan tumando lugá pa konstrukshon di sinku kancha.  

E kampionato ta primintí di bira un evento fasinante i festivo pa tantu e tenistanan komo públiko. “Nos ta spera ku e ta bira un tradishon i ku mas persona ta bai praktiká tènis na Boneiru,’ Ruijs ta konkluí.