Kralendijk – Bishitantenan na eventonan di riesgo haltu mester mustra un QR-code òf un prueba di tèst negativo den futuro. E QR-code ta e prueba digital ku un persona ta kompletamente bakuná. Siudadanonan no bakuná ku ke bai un evento, por tèst gratuitamente den futuro. 

Gezaghèber Edison Rijna ta konsultá ku e ministerio di VWS tokante introdukshon di e QR-code pa bishitá evento i e tèst grátis di bishitantenan no bakuná. Ta spera ku ta introdusí e QR-code pa evento i e tèst grátis obligatorio na novèmber.

Siudadanonan kompletamente bakuná for di djaluna te ku djabièrnè por yama 0800 0900 pa un sita pa buska e kódigo. Por alkansá e number akí di djaluna te ku djabièrnè di 08:00 – 17:00. Ora ta traha un sita, un persona mester tin e prueba di bakunashon, su pasaporte i sédula huntu kuné. 

Biahamentu

Di ekspreshonnan di Promé Minister di Kòrsou, Pik Pisas, por komprondé ku den futuro lo mester tin QR-code tambe pa biaha entre e islanan. Den un konferensia di prensa djabièrne Pisas a bisa ku e próksimo dos luna lo konsiderá komo transitorio, den sentido ku ainda por biaha ku e karnèt di bakunashon físiko, pero ku despues biaheronan di entre otro Boneiru lo mester tin QR code pa drenta Kòrsou. E QR-code lo mustra ku un hende ta sea ful bakuná, òf ku ela hasi un tèst ku a sali negative.