KRALENDIJK – Despues di e kandela na lèntfel na Lagun dia 5 di novèmber último, gezaghèber komo presidente di e tim insular di maneho a pidi RIVM pa ayudo. Na Boneiru e Servisio di Aksidente ku Medio Ambiente (Milieuongevallen Dienst – MOD) di RIVM (Instituto di Reino pa Salubridat Públiko i Medio Ambiente) a kolektá muestra di suela, di mata i di loke nan a bari den bisindario di e sitio pa depositá shushi. Meta di e investigashon akí ta pa haña un bista di e plamamentu di supstansia dañino ku a resultá den bisindario debí na e kandela. Entretantu un raportahe intermedio a bira konosí ku e promé resultadonan di e análisisnan di dioksina riba mata.

Supstansianan ku a bini liber

For di e resultadonan intermedio ta resultá ku a topa ku nivelnan mas haltu di dioksina riba mata den un área te ku 4 kilometer for di e sitio pa depositá shushi. Den e área akí te ku maksimalmente 2 kilometer ta midi nivelnan konsiderabelmente mas haltu, i pafó di e 2 kilometer akí nivelnan ku ta levemente mas haltu. E área akí a surgi debí na plamamentu di huma bou di influensia di bientu for di pariba (wak e mapa athunto). Dioksina ta supstansianan dañino ku entre otro ta bini liber ora ta kima (shushi di) plèstik. Riba término kòrtiku ta verwagt resultado di e otro análisisnan i despues lo komuniká tokante esaki. 

Salubridat i konseho

Hende ta ingerí dioksina prinsipalmente pa medio di kome vèt di bestia for di karni, webu i lechi. Galiña i kabritu por kome dioksina ku a resultá riba mata, i seguidamente esaki ta resultá den kuminda di hende via webu, karni òf lechi. Eksposishon ku ta dura kòrtiku na un nivel mas haltu di dioksina via kuminda, no ta kondusí na problema ku salú. Eksposishon ku ta dura largu na nivelnan mas haltu di dioksina via kuminda, sinembargo por trese riesgo di salú kuné, i ta importante pa evitá esaki.

Pa e motibu akí departamento di Salubridat Públiko di Entidat Públiko Boneiru ta konsehá:

• Bèrdura i fruta: Evitá di kome berdura i fruta ku no ta labá for di e área di efekto.
• Produkto di bestia: Evitá pa kome galiña, webu, karni òf bebe lechi di bestia ku a kana rònt den e área di efekto.