KRALENDIJK – E resultadonan di eksámen di Scholengemeenschap Bonaire (SGB) ta konosí despues di final di e segundo periodo. 

Un oumento notabel ta VWO, ku un porsentahe di graduashon di 87%, un oumento di 14% den komparashon ku e aña eskolar anterior. Igual ku aña pasá, VMBO-kader a skor mas altu. El a skor un porsentahe di graduashon di 98%. E porsentahe de graduashon na MAVO i HAVO ta komparabel ku e aña eskolar anterior. Na MAVO tin un kantidato ku na final di ougùstùs mester rekuperá un eksámen durante e di 3 periodo. Si e studiante gradua, e ora ei e porsentahe di graduashon di MAVO ta subi. Den komparashon ku aña eskolar anterior, VMBO-basis ta demostrá un disminushon den porsentahe di graduashon. 

Na SLP 36 alumno a hasi nan eksámen final, di kual 30 alumno a gradua. Tabatin un seremonia festivo pa e alumnonan di ISK. Un grupo di por lo ménos 37 alumno a risibí nan sertifikado i lo kontinuá den un di e otro unidatnan di SGB.

Na MBO tambe tabatin fiesta. A entregá 143 diploma na e studiantenan di mas di 20 diferente formashon. MBO ta positivo tokante e oumento den e ofresementu di formashonnan BBL. 

E próksimo aña eskolar lo amplia e ofresementu akí ku formashonnan pa asistente di dòkter i asistente di botikario.

Siman pasá a entregá tur sertifikado i diplomanan na e alumno- i studiantenan ku a gradua i e siman aki e fakansi grandi a kuminsá. SGB ta felisitá tur esnan ku a gradua i a risibí nan sertifikado òf diploma. Tambe SGB ta deseá nan hopi éksito pa ku nan siguiente estudio òf karera.