KRALENDIJK- Despues di hopi siman sin tendensia positivo, por bisa ku por fin e sifranan di Covid-19 na Boneiru ta kuminsá mustra un tiki mas alentador.

Pa algun dia kaba, por nota ménos infekshon nobo pa dia, mientras ku e kantidat di kaso total tambe ta bahando. E kantidat di infekshon, relativo na esnan ku a pasa tèst, a yega un punto relativamente abou ku 7,8% djadumingu, ku ta kasi mitar di loke e tabata ta algun dia pasá.

E preokupashon di mas grandi aktualmente ta e kantidat relativamente grandi ainda, di personanan ku ta interná den hospital pa motibu di Covid. Esaki ta para na 11 persona na Boneiru, i 1 pashènt di Boneiru ku ta wòrdu tratá na Curaçao Medical Centre (CMC).