BREDA – Binti atleta di Boneiru ta partisipá 14, 15 i 16 di yüni na Special Olympics na Breda i Tilburg. Huntu ku nan coach- i guianan e grupo ta konsistí di trinta persona. E partisipantenan ta kompetí ku mas ku 3.000 otro deportista.

Aeron Rosaria ta e coach prinsipal i ta enfatisá e koperashon úniko i interkambio di eksperensianan di e evento. “Partisipá ta mas importante ku gana,” Rosaria ta bisa. “Título ta bunita, pero plaser ta bini serka nos na promé lugá. Nos ta kontentu ku nos por partisipá komo munisipio spesial na e kompetensianan na Hulanda”. E atletanan ta partisipá den kuater ekipo, ku ta partisipá na atletismo, landamentu, futbòl i bolas. Spesialmente den bolas, atletismo i landamentu tin hopi chèns pa gana medaya.

E ekiponan ta bon prepará i a trein henter aña. Kompetensianan na Hulanda sinembargo lo ta diferente si pa e deportistanan. “Nan lo mester kustumbrá spesialmente ku e friu awe mainta”, Rosario ta konta. “Pa sierto di nan esaki ta e promé biaha na Hulanda. Dos aña pasá nos tabata na Twente, e tempu ei nos no tabatin ekipo di futbòl ainda. E aña aki si nos tin esei. Nan ta prepará”.

Boneiru ta optené promé medaya

Dejean Francees ta e promé atleta Boneriano ku a optené un medaya na Hulanda. Den e semi final e atleta di SV Athene a kore e tempu di mas rápido (10,63). Den finale e tabatin nèt punto di ménos pa para riba e podio mas haltu. Riba e parti di 100 meter sprent e atleta finalmente a gana un medaya di plata. Mas lat den e torneo Francees a kompetí pa e parti di 200 meter.

Dejean Francees ta gana medaya di plata riba 100 meter sprent 

Kustumbrá ku otro sirkumstansianan 

Djabièrnè anochi e seremonia di apertura a tuma lugá na Breda. E deportistanan ta haña e eksperensia den un otro pais fasinante i ta mira esaki komo un bunita eksperensia. Rosaria ta remarká ku e atletanan ta topa hopi kos nobo, manera kustumbernan di kome i infrastruktura na Hulanda. “Na Boneiru mayoria bes nos ta kome kuminda kayente mèrdia. Na Hulanda esei ta sosodé anochi so. Tambe nos atletanan mester kustumbra ku uzo di trein, lusnan di tráfiko i euro na lugá di dòler. Esakinan tur ta eksperensianan nobo pa nan”.

Banda di e kompetensianan tin un programa kultural tambe riba e programa. E ekipo lo hasi un tour den Amsterdam, bai kome afó den un restorant i  sera konosí ku kuriosidatnan Hulandes.