DEN HAAG- “Mag ik hier zijni?’ tabata e pregunta profundo ku a para sentral na e evento ‘Empowering my Caribbean Identity’ organisá pa Stichting WeConnect. E fundashon edukativo a trese huntu mas o ménos 50 studiante Karibense na Den Haag dia 28 di yüni pa papia tokante rasismo, diskriminashon i sintimentu di eksklushon. Esaki a resultá den un diálogo habrí den kua hende a ekspresá nan vulnerabilidat i na mes momento a mustra nan forsa.

E pregunta ‘Mag mi ta aki?’ tabata parti di un komedia pensá i ehekutá pa dos empleado di WeConnect. Nan a hala atenshon di públiko ku un pregunta konfrontadó: ‘Nan ta wak mi òf solamente mi koló?’ Vários hóben a kompartí eksperensia doloroso, manera durante un entrevista di trabou ta puntra tokante nan loyaldat pa ku Hulanda, no wòrdu  tumá na serio pa dòkter pasobra nan ta bini di Kòrsou i momentonan ku niun hende no ke sinta banda di bo den konvoi, ounke no tin mas lugá pa sinti i hende mester keda na pia.

Durwin Lynch, dosente i kordinadó di Health Science na Vrije Universiteit na Amsterdam, a hasi un kontribushon importante na e evento. Ela pone e studiantenan dialógá tokante momentu den kua nan ta sinti nan fuerte òf juist no. “Brasa bo mes,” ela duna komo sugerensia, i siña pa ta outéntiko. “E resilensia ei nos ke fortalesé dor di duna e hubentut un ambiente sigur pa ekspresá nan mes. Ta bunita i emoshonante pa wak kon nan ta hasi esaki,” asina manager di WeConnect Tanja Fraai a splika.

Rabin Baldewsingh, ku ta e Kordinadó Nashonal kontra Diskriminashon i Rasismo for di 2021, tabata un di e partisipanten. E a bisa ku su nòmber tambe tabata riba e lista famoso di e belastingdienst Hulandes tokante e toeslagenaffaire. Puntrá pa un punto di aksion konkreto pa yuda e hubentud Karibeño, e a sugerí: “Lo ta bon si gobièrno Hulandes traha riba eliminashon di dudanan di estudio.” E sugerensia aki a risibí aplauso duru.

Aña di komemorashon

Na nòmber di Ministerio di Asuntunan Interno i Relashonnan di Reino (BZK), direktor-general Roald Lapperre tabata presente. Ela trese dilante ku e historianan a impreshoná. E reunion aki tabata parti di e aña di komemorashon na kua a duna hopi atenshon na e abolishon di sklabitut. 

Tantu na Hulanda komo na e parti Karibise di Reino, vários aktividatnan ta wòrdu organisá. E aña di komemorashon ta kaba dia 1 di yüli es aña aki ku selebrashon di Keti Koti.