PARAMARIBO – Suriname Airways, SLM, a aunsiá plannan pa bula di nobo pa Trinidad i Tobago. Seis luna pasá, na mei 2022, el a suspendé su servisionan despues di a sirbi Port-of-Spain kasi tres desenio for di Paramaribo.

E kompania di aviashon ta bai bula ku e Boeing 737-800, ku el a introdusí resientemente komo avion di hür. E skema nobo di buelo regional ta bálido pa e periodo di 26 di mart te ku 5 di novèmber.

Komo konsekuensia di esaki e kompania di aviashon lo bai sirbi tres biaha pa siman e ruta Paramaribo – Georgetown – Miami i lo bolbe introdusí atrobe e buelonan di i pa Paramaribo – Port of Spain – Kòrsou dos biaha pa siman. Meskos ta konta pa e ruta Paramaribo – Aruba ku lo ta dos biaha pa siman.

E ampliashon di e posibilidatnan pa biaha ta parti di spesifikashon di e plan di rekuperashon, ku mester kondusí na un oumento di e potenshal di ganashi i e bienestar di SLM.