AMSTERDAM – Spesialmente pafó di Randstad studiantenan di Karibe ta sinti nan ménos na kas. Esaki a sali na kla for di un investigashon di studiante na Universidat Liber (VU) di Amsterdam  Jelano Hendriksma. Den su estudio el a investigá loke ta kontribuí na e sentimentu di sintibo na kas di studiantenan di Karibe na Hulanda i kua ta e bareranan ku ta hunga un ròl den esaki.

Hendriksma a hasi su investigashon komo parti di su estudio Management, Policy Analysis and Entrepreneurship in the Health & Life Sciences. Bou di guia di Durwin Lynch, kordinadó di e estudio universitario, el a entrevistá djesdos studiante Karibense ku ta sigui vários estudio HBO i WO na Hulanda. A presentá e resultadonan di e investigashon na e dunadónan di enkargo Stichting WeConnect i Athena Research, e instituto di investigashon di VU.

For di e investigashon a sali na kla ku studiantenan pafó di Randstad tin mas problema pa desaroyá un sentimentu di sinti nan na kas.  Nan ta eksperensiá mas hopi deskriminashon i rasismo, ku ta ekspresá hopi biaha sutil den e forma di mikro-agreshon. Esaki ta sosodé tin biaha pa ignoransia òf un falta di interes den otro kultura. E diferensia den eksperensia ta enfatisá kon importante e sitio geográfiko ta pa bienestar di e studiantenan.

Den su rekomendashonnan Hendriksma ta boga pa kontinuá ku inisiativanan manera esnan di WeConnect, ku ta krea sitionan seif kaminda studiantenan por kompartí nan eksperensianan. Ta enkurashá institutonan di enseñansa pa enbolbí mèntòrnan ku afinidat kultural. Tambe skolnan riba e islanan Karibense mester dediká mas atenshon na preparashon di studiantenan riba e shòk kultural i e posibel sentimentunan di eksklushon ku nan por eksperensiá na Hulanda.

Ta enkurashá studiantenan mes pa partisipá aktivamente na organisashonnan di studiante, hiba kòmbersashonnan i reflehá riba nan identidat i sentimentunan den nan ambiente nobo.

Durwin Lynch, guia di stazje di e investigashon, ta enfatisá e importansia di kontinuashon di e investigashon. E ta sugerí pa desaroyá i balidá un lista di pregunta mas ámplio pa asina haña mas bista den e eksperensianan di eksklushon i kon esaki ta influensiá nan salú mental i nan éksito di estudio. Gerente di WeConnect, Tanja Fraai ta añadí ku ta difísil pa sigui studiantenan pa motibu di privasidat, pero ku konfiansa i komunikashon habrí ta keda esensial.

E investigashon kompleto, ku ta hiba e título ‘Exploring the Sense of Belonging of Dutch Caribbean Students in the Netherlands,  ta optenibel pa interesadonan.