KRALENDIJK –  8 di sèptèmber ta dia internashonal di Alfabetisashon. E dia akí t’ei pa kòrda tur hende kon importante ta pa alfabetisá. No solamente pa e persona mes, sino tambe pa e komunidat kompleto. Ku e lema “Bon alfabetisá, mihó kapasitá”, Fundashon FORMA ta pone atenshon na e importansia di alfabetisashon durante e siman di 9 pa 13 di sèptèmber 2024.

Pa mas ku 16 aña FORMA a bin ta traha duru na konsientisashon di komunidat i ta duna guia riba tereno di alfabetisashon. Un analfabeto funshonal ta un persona ku por lesa i skibi un tiki, pero no sufisiente pa atendé su asuntunan di tur dia. Ku e persona no por lesa ni skibi sufisiente tin un impakto grandi den su bida. Tambe ora di buska trabou òf mantené un trabou e persona analfabeto funshonal por enkontrá problema. 

Kue lema di e aña akí, Forma ke enfatisá ku alfabetisashon ta mas ku siña lesa i skirbi. 

FORMA ta enfokando mas i mas riba temanan ku ta importante den bida diario, manera paga resibu, abilidat digital i outosufisiensia. Asina e persona por funshoná mas independiente. Esaki ta nifiká ku banda di siña lesa i skibi, ta traha riba mehorá e adulto su abilidat komunikativo i amplia su balor propio. Den e lèsnan na FORMA kada persona ta traha riba su propio metanan. Na momentu ku e persona logra un meta e ta haña un sertifikado. Esaki ta un logro pa e persona i algu pa e ta orguyoso di dje, tambe esaki tin bentaha pa su doño di trabou.  FORMA ta usa dos programa digital ku ta usa tema ku kua e adulto ta praktiká ku lesa i skibi: Alfabeter i Notinèt.

Den e siman aki di selebrashon, FORMA ta duna atenshon spesial na su partisipantenan. Nan ta pará sentral. Den e kuadro aki riba djaweps 12 di sèptèmber atardi, lo tin un tayer spesial pa e partisipantenan dirigí riba traha ku un presupuesto.

Tambe ta bishitá algun medio di komunikashon. Ademas riba medionan sosial lo tin atenshon pa e tema di alfabetisashon. 

Pa medio di Alfabetisashon, FORMA ta traha huntu ku e adulto analfabeto funshonal na un mihó futuro pa su mes i e komunidat di Boneiru.