KRALENDIJK- Riba 15 di desèmber 2021, 11 kachó pitbul a ataká un hòmber di 86 aña di edat na Lagun Hill.  Ku mordénan severo komo konsekuensia. E kachónan a Sali for di nan kura i a drenta kura di e hòmber kaminda nan a atake.

A base di e insidente KPCN a traha un rapòrt ku e petishon na Gezaghèber pa nombra e kachónan aki komo peligroso, konforme artíkulo 8, insiso 1 di e Lei di Kachó Boneiru 1997, i pa informá doño di e kachónan di esaki pa medio di un karta. 

A entregá e karta aki ku den dje tambe e kondishonnan pa e tin su kachónan na liña ora ta riba kaminda públiko i pa sòru pa nan tin un ‘muilkorf’ bisti, na doño di e kachónan. Kondishon ta tambe ku su kura mester ta di tal forma ku e kachónan no por sali for di e kura. E karta aki ta e último aviso di gezaghèber.Si despues di esaki no kumpli ku e kondishonnan stipulá den e karta, polis tin e outorisashon di gezaghèber pa, despues di konfiská e kachónan, eventualmente pasa nan angua.

Oumento

Diariamente notifikashon tokante kachó agresivo ku ta kana lòs  ta drenta. E frekuensia i seriedat di e notifikashon nan ta varia. Ta trata di notifikashon tokante entre otro kachó ku ta morde kabritu i galiña mata ku konsekuensia finansiero pa tenedó di bestia, pero tambe kachó ku ta ataká siklista i shofùr di skuter lokual ta krea situashonnan sumamente peligroso den tráfiko. E kantidat di insidente kaminda en bèrdat kachó ta morde un persona i ku esaki mester di tratamentu médiko, ta oumentando. 

Treinen

KPCN ke hala atenshon di doñonan di kachó pa tene kachónan den kurá dor di sòru pa un kurá stabil for di kua e kachónan no por sali i/òf pa mara e kachó. Esaki pa prevení tipo di situashonnan asin’aki. Ta rekomendabel pa sosialisá un kachó. Un kachó mester di edukashon i treinen. Pa esaki tin fasilidatnan presente na Boneiru. Abo komo doño  ta responsabel pa e komportashon  treinen di bo kachó.