KRALENDIJK- Danki na un koperashon entro Fondo di Penshun Karibe Hulandes (PCN) i Van Den Tweel, un di e supermerkadonan mas grandi na Boneiru, tin awor mas ku 710 panel di solo riba su dak.

E instalashon fotovoltaíko nobo nobo (‘PV’) ta usa e lus di solo briyante pa generá sufisiente elektrisidat pa su uso durante di dia.

E sistema aki tin un kapasidat di 284.000 watt i lo no pèrkurá solamente pa un uso di energia mas efisiente di Van den Tweel, pero e lo yuda tambe pa redusí e ‘carbon footprint’ na Boneiru drástiko, segun Bharat Bhojwani di Participatiemaatschappij Caribisch Nederland B.V. (‘PMCN’). PMCN ta e vehíkulo pa invertí kapital di Pensioenfonds Caribisch Nederland ‘PCN’  pa tur su invershonnan lokal riba e islanan BES

E transakshon di PMCN a bira posibel den forma di un  kombenio solar lease ku e grupo di Van den Tweel. E invershon aki ta pas perfektamente den e metanan Ambiental, Sosial i Bon Gobernashon (Environmental, Social and Governance “ESG”) di tantu PMCN  komo esnan di Van den Tweel Carribean. PMCN ta konta ku esaki ta e promé di mas instalashon-PV ku e ta hasi posibel riba islanan BES. Na Van den Tweel a demostrá ku por i ku e ta funshoná!

E distribuidó di instalashon-PV, IFA Solar Energy, ku ta establesé na Kòrsou, tabata un konekshon krusial den e totalidat. Señor Henoc Luis di IFA Solar Energy no ta un deskonosí den e sektor empresarial Boneriano i a instalá sistemanan semehante kaba pa mas empresa na Boneiru. “Pa e proyekto nos por a usa e mihó panelnan solar i konvertidó ku tin riba merkado. Elektrisistanan lokal di Boneiru a yuda nos profeshonalmente pa prepará e supermerkado pa e energia di e panelnan”, Luis ta bisa.

Kontentu

Direktor Ike Johnson i Chief Operating Officer Omar Barrientos di Van den Tweel Carribean Group ta hopi kontentu ku e invershon aki. “Na komienso di nos kòmbersashonnan pa posishoná e instalashon-PV, e preis na Boneiru tabata masoménos USD 0,23 pa kwh. Awor aki e ta mas ku USD 0,40 pa kwh, komo konsekuensia di e redukshon di supsidio for di Hulanda i e preisnan haltu pa kombustibel”. E invershon aki ta bini pues na e momentu perfekto pa e supermerkado grandi aki na Boneiru.

E siguiente ku ta na turno pa Van den Tweel Carribean na Boneiru ta Bonaire Warehouse. Segun espektativanan lo kuminsá ku instalashon na e sitio den luna di òktober.